Գեղարքունիքի Վարդգես Պետրոսյանի անվան մարզային գրադարանում հայ մեծանուն գրող Եղիշե Չարենցի կյանքի և ստեղծագործությունների մասին դասախոսությամբ հանդես եկավ գրականագետ, բանասիրական գիտությունների դոկտոր, պրոֆեսոր Դավիթ Գասպարյանը։
Դասախոսությունն ունկնդրեցին Գավառ համայնքի կրթական հաստատությունների հայոց լեզվի և գրականության ուսուցիչներ, բարձր դասարանների աշակերտներ, Գավառի պետական համալսարանի ուսանողներ, գրասերներ։
Դասախոսությունը կազմակերպվել էր Հայաստանի Գրողների Միության Գեղարքունիքի մարզային բաժանմունքի համակարգող, գրող և լրագրող Տիգրան Նիկողոսյանի նախաձեռնությամբ, Գեղարքունիքի մարզային գրադարանի տնօրինության հետ համագործակցությամբ։
Շուրջ մեկուկես ժամ Դավիթ Գասպարյանը ներկայացրեց Եղիշե Չարենցի կյանքի մանրամասները, նրա ապրած հերոսական ու ողբերգական ակնթարթները, ստեղծագործական առանձնահատկությունները, հայ գրական կյանքի վրա թողած անկշռելի ազդեցությունը, ապա պատասխանեց ունկնդիրներին հետաքրքրող հարցերին։
-Շատ կարևոր եմ համարում նման հադիպումները, քանի որ այսօրվա դասախոսության մասնակիցները հիմնականում նրանք են, ովքեր պետք է կենդանի խոսքը տեղափոխեն դպրոցներ ու հասցնեն աշակերտներին։ Իհարկե, տարբեր ժամանակներում շփումներ ունեցել եմ մանկավարժների հետ, դպրոցի հետ միշտ ունեցել կապեր։ Շատ լավ է, որ ուսուցիչների հիմնական մասն ունեն իրենց կարծիքը Չարենցի ստեղծագործությունների վերաբերյալ, սակայն միշտ պետք է Չարենց ուսուցանելիս հավատարիմ մնալ ստեղծագործության բնագրի բովանդակությանը և դրանց յուրովի մեկնաբանություն չտալ։ Ես այսօր հիմնականում ներկայացրի Եղիշե Չարենցի կյանքի ուղին, որը եղել է հերոսական ուղի։ Նա եղել է կամավոր, եղել է ազգի համար մաքառող մարտիկ, ազնվագույն ու խիզախ մտավորական, երկրի կառուցմանը մասնակցող բանաստեղծ, բութ միջավայրից հալածյալ մարդ։ Եղիշե Չարենցի կյանքը Աստվածային խորհրդի պես է․ Նա էլ հալածվեց՝ ինչպես Քրիստոսը, խաչվեց ու ապա հարություն առավ, ինչպես Քրիստոսը։ Չարենցը ոչ միայն հայ, այլ նաև համաշխարհային գրականության հզոր դեմքերից է։ Այո, մենք գործ ունենք հերոսական կերպարի հետ, ում արժեքը դեռ շատերը չեն գիտակցում։ Ուստի մենք պետք է պահպանենք այդ արժեքների գիտակցումը և պետք է գնանք դեպի Չարենցը, այլ ոչ թե Չարենցին փորձենք հարմարեցնել մեզ,- նշեց Դավիթ Գասպարյանը։ 
-Դավիթ Գասպարյանի դասախոսություններին ծանոթ եմ նրա գրքերից կամ հոդվածներից ու մենագրություններից, սակայն այլ բան էր կենդանի խոսքը, մասնավորապես՝ այս դասախոսությունը, որն արդեն պետք է տեղափոխվի դասարաններ։ Ուրախալի էր նաև այն , որ դասախոսւթյունը լսեցին մեր աշակերտները, ովքեր տպավորված են իրենց լսածից ու կիսվելու են համադասարանցիների հետ,-նշեց Գավառի Գեորգի Մնացականյանի անվան թիվ 7 միջնակարգ դպրոցի հ․ լեզվի և գրականության ուսուցչուհի Կարինե Կարեյանը։
Գեղամա աշխարհ