Նոյեմբերի 7-ին Գեղարքունիքի մարզպետ Կարեն Սարգսյանն ընդունեց, շնորհավորեց ու շնորհակալագրով պարգևատրեց այս տարվա հոկտեմբերի 8-14-ին Անգլիայի մայրաքաղաք Լոնդոնում կայացած Քիքբոքսինգի աշխարհի առաջնությունում Գեղարքունիքի մարզը ներկայացնող մրցանակակիր մարզիկներին՝ Ձորագյուղի հիմնական դպրոցի աշակերտներ Գրիգոր Սաֆարյանին , Խաչիկ Խլղաթյանին, Գանձակի թիվ 1 միջնակարգ դպրոցի աշակերտ Խաչիկ Ասատրյանին և նրանց մարզիչ Արաքս Մարգարյանին։
Գրիգոր Սաֆարյանը աշխարհի առաջնությունից տուն է վերադարձել ոսկե, Խաչիկ Խլղաթյանը՝ արծաթե, Խաչիկ Ասատրյանը՝ բրոնզե մեդալով։
Մեկ տարի առաջ Գերմանիայի մայրաքաղաք Բեռլինում կայացած աշխարհի առաջնությունում նույնպես փայլել էին այս մարզիկները․Գրիգոր Սաֆարյանը հռչակվել էր աշխարհի չեմպիոն, Խաչիկ Ասատրյանը դարձել էր արծաթե, Խաչիկ Խլղաթյանը՝ բրոնզե մեդալակիր։
Գրիգոր Սաֆարյանն ու Խաչիկ Խլղաթյանը մարզվում են Ձորագյուղի մշակույթի կենտրոնում, Խաչիկ Ասատրյանը՝ Գավառի մարզադպրոցի Գանձակի մասնաճյուղում։
Երեք մարզիկներն էլ իրենց քաշային կարգերում քանիցս դարձել են Հայաստանի ու Անդրկովկասի առաջնությունների չեմպիոններ՝ որակավորվելով աշխարհի առաջնության մասնակիցների ցանկում։ Գրիգոր Սաֆարյանը 9 տարեկան է , Խաչիկ Խլղաթյանը՝ 8, Խաչիկ Ասատրյանը՝ 13։
Կարեն Սարգսյանը զրուցեց մարզչի ու մարզիկների հետ, շնորհակալություն հայտնեց նրանց՝ միջազգային ստուգատեսներում Հայաստանի պատիվը բարձր պահելու համար, հետաքրքվեց մարզումների հաճախականությամբ ու պայմաններով, մրցանակակիր մարզիկների ուսման առաջադիմությամբ, ապա նրանց մաղթեց նորանոր հաջողություններ հեղինակավոր գալիք մրցաշարերում։
Գեղամա աշխարհ