Արդեն շուրջ 1 ամիս է, ինչ Մարտունի համայնքի Ներքին Գետաշեն գյուղի հատվածում սկսվել և ընթանում են Սևան-Մարտունի-Գետափ միջպետական ճանապարհի՝ Արգիճի գետի վրա կառուցված կամրջի հիմնանորոգման աշխատանքները։
Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչության տվյալներով՝ Սևան-Մարտունի-Գետափ միջպետական ճանապարհի Ներքին Գետաշենի հատվածի կամրջի հիմնանորոգման ծրագրի պայմանագրային արժեքը կազմում է 78,5 միլիոն դրամ, որն ամբողջությամբ հատկացվում է պետբյուջեի միջոցներից։
Ծրագրով նախատեսված է՝ կամրջի հիմքերի ու հենարանների ամրացում, թռիչքային կառուցվածքի վերանորոգում ու երթևեկելի մասի երկշերտ ասֆալտբետոնյա ծածկի տեղադրում։
2025 թվականի նոյեմբերի 4-ի դրությամբ շինարարական աշխատանքներն ավարտվել են շուրջ 80 տոկոսով։
Շինարարությունը նախատեսվում է ավարտի հասցնել այս տարվա ընթացքում։
Շինարարական աշխատանքներն իրականացնում է «Շանթ-Սեյրան» ՍՊԸ-ն։
Գեղամա աշխարհ