Գեղարքունիքի մարզի Գավառ համայնքի Ծաղկաշեն գյուղում այս տարվա ամռան սկզբից մեկնարկել և ընթանում են վարչական ղեկավարի գրասենյակի և երեխաների ու երտասարդների համար ժամանցի կազմակերպման նոր շենքի կառուցման աշխատանքները։
Գավառի համայնքապետարանի աշխատակազմից սատված տեղեկատվության համաձայն՝ Ծաղկաշենի վարչական ղեկավարի նստավայրի նոր շենքի կառուցման ծրագրի պայմանագրային արժեքը կազմում է 200 միլիոն դրամ, որն ամբողջությամբ հատկացվում է Գավառ համայնքի 2025 և 2026 թվականների բյուջեներից։
Շենքը նախագծով երկհարկանի է՝ կիսով չափ նկուղային հարկով։
2025 թվականի նոյեմբերի 4-ի դրությամբ արդեն կատարվել են երկաթբետոնյա կոնստրուկցիաների աշխատանքները, պատերի շարվածքը և առաջին հարկի ծածկի կառուցումը։ Դրանք 2025 թվականին նախատեսված աշխատանքներն էին, որոնք ավարտված են, իսկ այժմ ընթանում են արտաքին կոյուղու և սեպտիկ հորի, ինչպես նաև ապաստարանի ելքի և անցուղու կառուցման աշխատանքները։
Օրերս Ծաղկաշենի վարչական ղեկավարի նստավայրի նոր շենքի կառուցման շինհրապարակում մշտադիտարկում է իրականացրել Գավառ համայնքի ղեկավար Գուրգեն Մարտիրոսյանը։
Գեղամա աշխարհ