Գեղարքունիքի մարզի Ճամբարակ համայնքի Այգուտ գյուղի միջնակարգ դպրոցի «Արմաթ» ճարտարագիտական աշխատանոցի սաները մրցանակների են արժանացել միջազգային մրցույթներում։
Այգուտի միջնակարգ դպրոցի «Արմաթ» ճարտարագիտական աշխատանոցի խմբավար Շահեն Արաբաչյանը, խմբակի սաներն անընդմեջ մասնակցել են տարատեսակ միջոցառումների, մրցույթների և ցուցահանդեսների, վերջին տարիներին՝ նաև ԱԹՍ մրցույթների և զբաղեցրել մրցանակային տեղեր հատկապես ռոբոտաշինության ու ԱԹՍ մրցույթների ժամանակ։
-Վերջին մեկ տարվա ընթացքում Այգուտի «Արմաթ» Ճարտարագիտական աշխատանոցի սաների հետ մասնակցել ենք 3 միջազգային մրցույթների, «FirstRobotiks» և «WRO» ռոբոտաշինության միջազգային մրցույթներին, որոնցից «FirstRobotiks» մրցույթին մասնակցել ենք ԱՄՆ-ում, իսկ «WRO» (ռոբոտների համաշխարհային օլիմպիադա) բաց առաջնությանը մասնակցել ենք Սլովենիայի Լյուբլյանա քաղաքում, այս տարվա սեպտեմբերի 3-5-ին։ Վերջին՝ Ռոբոտների համաշխարհային օլիմպիադայի բաց առաջնությանը մեր խմբակի 2 և Երևանի թիվ 131 դպրոցի Արմաթի 1 սան ներկայացան «Ապագա նորարարներ» անվանակարգում, կրտսեր տարիքային խմբում, որի շրջանակներում ներկայացրինք մի ռոբոտասարք, որը կարողանում է ամրացվել գազատար խողովակին, և , շարժվելով գազատար խողովակի երկայնքով, փնտրում է գազի արտահոսք, որը հայտնաբերելու դեպքում կանգ է առնում, արձակում զգուշացնող բարձր ձայնային ազդանշան և ուղարկում է SMS հաղորդագրություն ռոբոտը սպասարկող մասնագետին կամ գազի վթարային ծառայության աշխատակցին, ինչից հետո մասնագետը կարողանում է GPS համակարգի միջոցով իմանալ, թև որտեղ է գտնվում ռոբոտը և մոտենում է՝ վթարված գազատար խողովակը նորոգելու։ Միջազգային այդ ստուգատեսում՝ կրտսեր տարիքային խմբում, մեր սաները գրավեցին պատվավոր առաջին հորիզոնականը՝ ստանալով Ռոբոտների համաշխարհային օլիմպիադայի եզրափակիչ փուլին մասնակցելու ուղեգիր։ Գլխավոր ստուգատեսը կկայանա 2025 թվականի նոյեմբեր ամսի վերջին, Սինգապուրում։ Թիմի կազմում ներգրավված են Այգուտի «Արմաթ» ճարտարագիտական աշխատանոցի սաներ Գրիգոր Խոջայանը, Արարատ Բայանդուրյանը և Երևանի թիվ 131 դպրոցի Արմաթ ճարտարագիտական աշխատանոցի սան Վահե Գաբրիելյանը»,-ներկայացրեց Շահեն Արաբաչյանը։
Այգուտի միջնակարգ դպրոցի Արմաթ ճարտարագիտական աշխատանոցն իր գործունեությունը սկսել է 2018 թվականի հունվար ամսից ու մինչ այժմ ակտիվ գործունեւթյուն է ծավալում։ «Արմաթ» ճարտարագիտական աշխատանոցում սովորում են 13 սան։ «Արմաթ»-ը արտադասարանական խմբակ է, որտեղ ստանում են համընդհանուր ճարտարագիտական կրթություն։ «Արմաթում» ուսումնասիրվում է 4 կրթական ուղղություններ, որոնք են՝ ծրագրավորում-ծրագրավորման հիմունքներ, եռաչափ մոդելավորում-եռաչափ տպագրություն եռաչափ տպիչով, 2D գրաֆիկա-աշխատանք թվային կառավարմամբ շաղափային և լազերային հաստոցով, ռոբոտաշինություն-միկրոէլեկտրոնիկայի տարրեր։
Շահեն Արաբաչյանը լի է եռանդով, ոգևորված իր սաների միջազգային նվաճումներով ու հավատացած, որ գրանցված հաղթանակներին հաջորդելու են ավելի ծանրակշիռ հաջողությունները։
Խոսրով Խլղաթյան