Արդեն մեկ ամիս է, ինչ Գեղարքունիքի մարզի Մարտունի համայնքի Ներքին Գետաշեն գյուղում սկսվել և ընթանում են մշակույթի տան դահլիճի և բեմական հատվածի հիմնանորոգման աշխատանքները «Մասնակցային բյուջետավորում» ծրագրի շրջանակներում։
Ներքին Գետաշենի վարչական ղեկավար Ռուբեն Զուլոյանի տեղեկացմամբ՝ Ներքին Գետաշենի մշակույթի տան դահլիճի ու բեմական հատվածի հիմնանորոգման ծրագրի պայմանագրային արժեքը կազմում է 36 միլիոն դրամ, որն ամբողջությամբ հատկացվել է Մարտունի համայնքի բյուջեից։
Ծրագրով նախատեսվում է մեծ դահլիճի, բեմի, հանդերձարանային երկու սենյակների, սանհանգույցների, միջանցքի նորոգում, նոր դռների ու լուսամուտների տեղադրում։
Շինարարական աշխատանքները նախատեսված է ավարտի հասցնել այս տարվա ընթացքում։
-Ներքին Գետաշենի մշակույթի տունը հիմնանորոգման է ենթարկվել տարբեր տարիների ընթացքում ու տարբեր ծրագրերով։ Իսկ «Մասնակցային բյուջետավորում» ծրագրով իրականացվող այս աշխատանքներով մենք ավարտի ենք հասցնում մշակույթի տան հիմնանորոգման գործընթացը։ Կահավորումը կիրականացվի մեկ այլ ծրագրի շրջանակներում,-ներկայացրեց Ռուբեն Զուլոյանը։
Գեղամա աշխարհ