Գեղարքունիքի մարզի Վարդենիս համայնքի Ակունք գյուղում ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում արդեն մեկ ամիս է, ինչ սկսվել և ընթանում են ոռոգման համակարգի կառուցման աշխատանքները։
Ակունքի վարչական ղեկավար Նիկոլա Խաչատրյանի տեղեկացմամբ՝ Ակունք գյուղի ոռոգման համակարգի կառուցման ծրագրի պայմանագրային արժեքը կազմում է 149 միլիոն դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Ակունքի համայնքապետարանը։ Ծրագրով նախատեսված է ոռոգման ջրատարի կառուցում Ակունքի փողոցներում, երկաթբետոնյա կիսախողովակներով, 2730 գծամետր երկարությամբ։
Ծրագրի իրականացման արդյունքում 2026 թվականի ոռոգման սեզոնին նորակառույց առուներն առանց կորստի ջուր կհասցնեն 930 տնտեսության տնամերձ հողամասեր:
« Ոռոգման հին համակարգը, որը սկսվում է Գառնիկ Խաչատրյան փողոցից, անցնում 9-րդ փողոցով ու ավարտվում Զորավար Անդրանիկ փողոցի վերջնամասում, խարխլված, ջարդված վիճակում էր:Հողային շերտով էր ջուրը գնում, որն ահռելի մեծ քանակությամբ կորուստներ էր տալիս:Կարտոֆիլի ցանքատարածություններ են շուրջբոլորը: Ոռոգման ցանցը նպաստելու է, որպեսզի գյուղացիներն առավել ևս շատ կարողանան մշակել հողատարածքները: Եթե եղանակային պայմանները չխոչընդոտեն, ոռոգման համակարգի շինարարությունը կավարտվի առաջիկա մեկ-երկու շաբաթների ընթացում»,-ներկայացրեց Նիկոլա Խաչատրյանը:
2025 թվականի հոկտեմբերի 27-ի դրությամբ շինարարական աշխատանքներն ավարտված են շուրջ 80 տոկոսով։
Անահիտ Կարեյան