Գեղարքունիքի մարզի Ճամբարակ համայնքի Ծափաթաղ գյուղում հոկտեմբերի 27-ի ժամը 16-ի սահմաններում անհետացել է երեքամյա Տիգրան Օվանեսովը՝ Արմեն Օվանեսովի և Փառանձեմ Վաթյանի ընտանիքի հինգերորդ երեխան։ Որոնումներն ընթացել են գյուղի ողջ տարածքով մեկ, պետական մարմինների ու բնակչության լայն ներգրավվածությամբ, երեկ երեկոյան ու այսօրվա գիշերային ժամերի ընթացքում ու այժմ էլ շարունակվում են, սակայն առայժմ երեխան չի հայտնաբերվել։
Ինչպես «Արմենպրես»-ին տեղեկացրեց Ծափաթաղի վարչական ղեկավար Դավիթ Գզողյանը, երեխան դրսում խաղալիս է եղել իր 5 տարեկան եղբոր հետ ու անհետացել է առայժմ անհասկանալի պայմաններում։
«Որոնողական աշխատանքներն իրականացվել են մարդկային ու մասնագիտական մեծ ներգրավվածությամբ։ Երեխայի անեհատանալու հենց առաջին պահից մեր ահազանգին արձագանքել են պետական մարմինները՝ փրկարար ծառայություն, ոստիկանություն, ազգային անվտանգություն, պարեկային ծառայություն։ Ողջ գիշերվա ընթացքում գյուղում են եղել Գեղարքունիքի մարզպետ Կարեն Սարգսյանը և Ճամբարակ համայնքի ղեկավար Վազգեն Ադամյանը, հիմա էլ որոնողական աշխատանքներին մասնակցում են Գեղարքունիքի մարզպետի աշխատակազմի և Ճամբարակի համայնքապետարանի ներկայացուցիչները։ Գործի են դրվել դրոններ, բերվել վարժեցված շներ, որոնումներն ընթացել են գյուղի տարածքներով ու տներով մեկ, շրջակայքում, առանց դադարի, դրանք հիմա էլ շարունակվում են , սակայն առայժմ որևէ դրական արդյունքի չենք հասնում։ Որոնողական աշխատանքներում ներգրավվել են նաև հարևան Արտանիշ գյուղի բնակիչները։ Ոչ միայն կորած երեխայի ծնողները, այլ ողջ գյուղն է հայտնվել հոգեբանական ծանր ապրումների մեջ»,-ներկայացրեց Դավիթ Գզողյանը։
«Մենք չէինք սպասում նման լայն ու օպերատիվ արձագանքի, ինչը եղավ մեր ահազանգից հետո։ Դժբախտ ընտանիքի կողքին են ոչ միայն Ծափաթաղի բոլոր բնակիչները, այլ նաև պետական համապատասխան բոլոր գերատեսչությունների ներկայացուցիչները։ Որոնումներն ընթացել ու ընթանում են անդադար, բոլոր ուղղություններով, երևի թե մի տեղ մի անկյուն չմնաց, որ չզննվի, չստուգվի։ Եթե այսքանից հետո երեխային չենք գտնում, ապա ստիպված ենք մտածել, որ նրան գուցե առևանգել ու այլ տարածք են տեղափոխել։ Ամեն դեպքում, որոնումները չեն դադարի, մինչև որ երեխան չգտնվի»,-ներկայացրեց Ծափաթաղի բնակիչ, Ծափաթաղ համայնքի նախկին ղեկավար Թագուհի Բոյախչյանը։
Խոսրով Խլղաթյան