Այսօր Հրազդան գետում անցկացվել է բոյդարկաների և կանոեների հուշամրցաշար՝ նվիրված Արցախյան 44-օրյա պատերազմում հերոսաբար զոհված Գորիս Հովսեփյանի հիշատակին:
Հուշամրցաշարին մասնակցեցին 40-ից ավել մարզիկներ: Հաղթողները պարգևատրվել են հուշամեդալներով և գավաթներով:
Արդեն հինգերորդ տարին է, ինչ Սևանի Աշոտ Ավետիսյանի անվան ջրային մարզաձևերի դպրոցը նախաձեռնում և անցկացնում է բոյդարկաների և կանոեների հուշամրցաշար՝ նվիրված 44-օրյա պատերազմու հերոսաբար զոհված Գորիս Հովսեփյանի հիշատակին: Գորիսը ծնվել է 2001թվականի փետրվարի 14-ին, Սևան քաղաքի Ցամաքաբերդ թաղամասում։ Զբաղվել է տարբեր մարզաձևերով: Ամենից շատ սիրում էր թիավարությունը։ Մասնակցել է շատ մրցումների ու միշտ զբաղեցրել է առաջատար հորիզոնականներ։ Ստացել է շատ պատվոգրեր, մեդալներ ու մրցանակներ։ Ավարտել է Ցամաքաբերդի թիվ 5 միջնակարգ դպրոցը, այնուհետև Սևանի պետական քոլեջը։
2019 թվականի հուլիսին ուսումը կիսատ թողելով զորակոչվել էր բանակ։
Հոկտեմբերի 12-ին հերթական մարտական առաջադրանքը գերազանց կատարելուց հետո թշնամին նկատել է իրենց խումբը։ ԱԹՍ-ի հարվածից անմահացել են խմբի 15 հերոս տղաները, որոնց թվում էր նաև Գորիսը։
Հայրենիքի սահմանները պաշտպանելիս ցուցաբերած արիության ու խիզախության համար Գորիս Հովսեփյանը հետմահու պարգևատրվել է «Մարտական ծառայության» մեդալով:
Նրա վառ հիշատակը հավերժ կմնա բոլորի սրտում:
Ցամաքաբերդի միջնակարգ դպրոցի ՆԶՊ առարկայի դասարանը կրում է Գորիս Հովսեփյանի անունը:
Սևանի Ցամաքաբերդ թաղամասի բնակիչների նախաձեռնությամբ Ցամաքաբերդում կանգնեցվել է Խաչքար և Արծիվ հուշարձան նվիրված Արցախյան 44-օրյա պատերազմում նահատակված Գորիս Հովսեփյանի հիշատակին։
Արմինե Ղուկասյան