Գեղարքունիքի մարզկենտրոն Գավառ քաղաքի Գրիշա Ափրոյանի անվան մարզադպրոցի սան Արտյոմ Մուխսյանը վերջերս Եգիպտոսում կայացած պարածանրամարտի աշխարհի առաջնությունում Հայաստանի հավաքականի կազմում արծաթե մեդալ է նվաճել։
Գավառի համայքնապետարանի աշխատակազմի ստացված տեղեկատվության համաձայն՝ պարածանրամարտի աշխարհի առաջնությանը Արտյոմը հանդես է եկել 65 կգ քաշային կարգում և ձգում պառկած դիրքով վարժությամբ՝ բարձրացրած քաշի և մոտեցումների հանրագումարի արդյունքում , 
նվաճել արծաթե մեդալ։ Մրցաշարին մասնակցել են վեց տասնյակից ավելի երկրներ։
Միջազգային մրցասպարեզում սա Արտյոմի երկրորդ ձեռքբերումն է․ այս տարվա մայիսին Վրաստանի Թբիլիսի քաղաքում նա մասնակցեց աշխարհի գավաթի 2025 թվականի առաջնությանը և ոսկե մեդալակիր դարձավ։ Մարզիկի հաջողությունների գործում մեծ ներդրում ունեն մարզիչ Ժորա Հովհաննիսյանը, ընտանիքի անդամները, բոլոր այն մարդիկ, ովքեր աջակցում և ոգևորում են։
«Մենք ծնողներով շատ հպարտ ենք, որ մեր որդին հաղթանակներ է տանում միջազգային հարթակներում, որ բարձր է պահում իր ծննդավայրի անունն ու պատիվը։ միաժանական մեր երախտագիտությունն ենք հայտնում նրա մարզչին, նաև՝ Գավառ համայնքի ղեկավար Գուրգեն Մարտիրոսյանին՝ ցուցաբերած բարոյական ու նյութական խրախուսանքների համար»,-նշել է Արտյոմի հայր Դավիթ Մուխսյանը։
«Առկա ձեռբերումներով, սակայն, Արտյոմը չի պատրաստվում սահմանափակվել: Մարզիչ Ժորա Հովհաննիսյանի հետ նա շարունակելու է պարապմունքները՝ պարածանրամարտում հաջողությունները բազմապատկելու նպատակադրումով»,-հավաստեցին Գավառի համայնքապետարանի աշխատակազմից։
Գավառի համայնքապետարանում և Գրիշա Ափրոյանի անվան մարզադպրոցում շուքով են դիմավորել միջազգային հարթակում հաղթանակ ապահոված Արտյոմ Մուխսյանին։