Գեղարքունիքի մարզի Ճամբարակ համայնքում ՄԱԿ-ի Զարգացման ծրագրով ոռոգման ջրի օրվա կարգավորիչ ջրամբար է կառուցվում:
Ճամբարակ համայնքի ղեկավարի առաջին տեղակալ Ռոբերտ Օհանյանի տեղեկացմամբ՝
որպես ծրագրի առաջնահերթություն, հաշվի են առնվել համայնքի սահմանամերձ լինելն ու արցախցի ընտանիքների՝ այնտեղ բնակվելը: Ծրագիրը ֆինանսավորվում է Ճապոնիայի կառավարության կողմից:
Ջրամբարն ունի 11 հազար խորանարդ մետր օգտակար ծավալ: Ներկայումս ավարտվել են հողային աշխատնքները: Առաջիկայում պետք է ավարտվի մեմբրանացումը: Ապա կկատարվի ցանկապատումը՝ անվտանգությունն ապահովելու նպատակով:
Մեմբրանային տեխնոլոգիայով ջրամբարի կառուցումն առավել արագ և արդյունավետ է՝ ջրի կորուստները կանխելու առումով: Ճապոնիայի կառավարությունը 46 միլիոն դրամ է հատկացրել այս շինարարության համար: Ոռոգման օրվա կարգավորիչ ջրամբարին կից, արդեն երկրորդ փուլով, կկառուցվի նաև ոռոգման ցանց: Այս աշխատանքներն արդեն կիրականացվեն համայնքի համաֆինանսավորմամբ: Պահանջվող 42 միլիոն դրամից 15 միլիոնը կհատկացվի համայնքի բյուջեից:
«Ոռոգման ցանցից կօգտվեն շուրջ 200 տնտեսություն, ավելի քան 400 հեկտար հողատարածություններ կանցնեն ոռոգման համակարգի տակ: Մենք ավանդական մշակաբույսերի մշակումից պետք է անցնենք նաև արդյունավետ, ինտենսիվ գյուղատնտեսություն վարելուն: Եվ հենց ոռոգման համակարգը միտված է , որպեսզի մեր բնակիչները սովորեն ժամանակակից գյուղատնտեսական մշակաբույսերի մշակման տեխնոլոգիաներին»,-նշեց Ճամբարակ համայնքի ղեկավարի առաջին տեղակալ Ռոբերտ Օհանյանը:
Նախատեսված է օրվա կարգավորիչ ջրամաբարի և ոռոգման ցանցի կառուցումն ավարտել այս տարի, որպեսզի հաջորդ տարի հողօգտագործողները հնարավորություն ունենան մշակություն իրակակացնելու նաև այս դաշտերում, որոնք առայժմ, ոռոգման հնարավորությունից զուրկ լինելով, օգտագործվում են որպես խոտհարքեր: