Գեղարքունիքի մարզի Վարդենիս համայնքի Սոթք գյուղում տեղի է ունեցել ոռոգման նորակառույց համակարգի բացման արարողությունը։
Ինչպես տեղեկացրին Վարդենիսի համայնքապետարանի աշխատակազմից, արարողությանը մասնակցել են ՀՀ Գեղարքունիքի մարզպետ Կարեն Սարգսյանը, Վարդենիս համայնքի ղեկավար Ահարոն Խաչատրյանը, Գեղարքունիքի մարզպետի տեղակալ Վահան Զարոյանը, ՄԱԿ-ի Պարենի համաշխարհային ծրագրի Հայաստանյան գրասենյակի ղեկավար Լեյլա Մելիումը, ՀՀ ՏԿԵՆ, ՏԿԵՆ ՋԿ և ՀՀ ԱԳՆ ներկայացուցիչներ, համայնքի բնակիչներ և հյուրեր։
Ծրագիրն իրականացվել է ՄԱԿ-ի Պարենի համաշխարհային ծրագրի, «Հայկը՝ մեր հերոսների համար» ամերիկյան հասարակական կազմակերպության և Վարդենիս համայնքի եռակողմ աջակցությամբ։ Ծրագրի պայմանագրային արժեքը կազմել է 20 միլիոն 400 հազար դրամ, որի իրականացման արդյունքում կառուցվել է 6,2 կմ երկարության ոռոգման ջրագիծ և 4 400 խմ տարողությամբ ջրամբար։
Արդեն Սոթքում շուրջ 160 հեկտար ցանքատարածություն ապահովված է անխափան ոռոգմամբ՝ ստեղծելով բարենպաստ պայմաններ գյուղատնտեսության զարգացման, բերքատվության բարձրացման և Սոթքի տնտեսությունների ամրապնդման համար։
Ողջույնի խոսքով հանդես է եկել Վարդենիս համայնքի ղեկավար Ահարոն Խաչատրյանը, ով մասնավորապես նշել է, որ սահմանամերձ բնակավայրերում, որոնցից մեկը Սոթքն է, ապրող յուրաքանչյուր ընտանիք, յուրաքանչյուր երեխա իր ներկայությամբ ու իր աշխատանքով ամրացնում է մեր սահմանը, հետևաբար, այս բնակավայրերի նկատմամբ ուշադրությունն ու հոգածությունը պետք է լինեն մշտական և հետևողական։
«Իմ և Վարդենիս համայնքի անունից շնորհակալություն եմ հայտնում Գեղարքունիքի մարզպետ Կարեն Սարգսյանին, ՄԱԿ-ի Պարենի համաշխարհային ծրագրի Հայաստանյան գրասենյակին և «Հայկը՝ մեր հերոսների համար» բարեգործական հասարակական կազմակերպությանը»,-նշել է համայնքի ղեկավարը։
Միջոցառման ավարտին Ահարոն Խաչատրյանը պատվոգիր և շնորհակալագիր է հանձնել ծրագրի իրականացմանն իրենց ներդրումն ունեցած գործընկերներին՝ կարևորելով նրանց կատարած աշխատանքը, համագործակցությունն ու աջակցությունը։
Առաջիկայում նմանատիպ ծրագիր կիրականացվի նաև Վարդենիս համայնքի Գեղամասար գյուղում։
Գեղամա աշխարհ