Գեղարքունիքի մարզկենտրոն Գավառ քաղաքում ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում շարունակվում են ճանապարհաշինական աշխատանքները Միքայելյան փողոցում, ավարտական փուլում են գտնվում 5 փողոցների հիմնանորոգման աշխատանքները։
Ինչպես տեղեկացրին Գավառի համայնքապետարանի աշխատակազմից, Գավառ քաղաքի Միքայելյան փողոցի հիմնանորոգման աշխատանքները մեկնարկել են 2025 թվականի ապրիլից և իրականացվել երկու փուլով։ 2025 թվականին իրականացվել է աշխատանքների շուրջ 50 տոկոսը։ Միքայելյան փողոցի հիմնանորոգման ծրագրի պայմանագրային արժեքը կազմում է 435 միլիոն դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Գավառի համայնքապետարանը։ Ծրագրով նախատեսվում է Միքայելյան փողոցի և նույն փողոցի վրա գտնվող թիվ 16, 18, 20 բազմաբնակարան բնակելի շենքերի բակերի ասֆալտապատում՝ 1,5 կիլոմետր երկարությամբ, 14 հազար քառակուսի մակերեսով և մայթերի ու ջրահեռացման ներքին համակարգի կառուցում։ Աշխատանքներն ընդհատվել են 2025 թվականի վերջերին, եղանակային պայմաններից ելնելով, ու վերսկսվել 2026 թվականի ապրիլից։ 2026 թվականի մայիսի 8-ի դրությամբ ծրագիրն իրականացված է շուրջ 80 տոկոսով։
2025 թվականի սուբվենցիոն ծրագրերի շրջանակներում ավարտական փուլում են գտնվում Գավառ քաղաքի Իսահակյան փողոցի, Իսահակյան փողոցի 1-ին և 2-րդ նրբանցքների, Սայադյան փողոցի 2-րդ նրբանցքի, Կոլոտի Հայրապետ, Զորավար Անդրանիկ փողոցների հիմնանորոգման աշխատանքները։ Ծրագրի պայմանագրային արժեքը կազմել է 63 միլիոն 733 հազար դրամ, որի 50 տոկոսը հատկացրել է ՀՀ կառավարությունը, 50 տոկոսը՝ Գավառի համայնքապետարանը։ Շինարարական աշխատանքները մեկնարկել են 2025 թվականի սեպտեմբերից և ավարտվել 2026 թվականի ապրիլի վերջին։
Գեղամա աշխարհ