Ապրիլի 25-ի առավոտվա ժամերից Գեղարքունիքի մարզի քաղաքային և գյուղական բնակավայրերում ընթացել են Քաղաքացու օրվան նվիրված միջոցառումները։
Ինչպես տեղեկացրին Գեղարքունիքի մարզպետի աշխատակազմի ԿՄՍ վաչությունից, Սևան համայնքը միացել է Քաղաքացու օրվա միջոցառումներին, որի շրջանակներում նախատեսված են միջոցառումներ Սևանի բիզնես կենտրոնում և Լճաշեն բնակավայրի մշակույթի տանը, Ծովագյուղի երիտասարդական կենտրոնում:
Միջոցառման այս ձևաչափի նպատակն է «քաղաքացի», «պետականություն» հասկացությունների արժևորումը, պետության և հասարակության նկատմամբ հոգատար, նվիրված ու պատասխանատու վարքագծի ձևավորումը:
Ս. Զաքարյանի անվան մշակույթի պալատում և Լճաշենի Ր. Հովհաննիսյանի անվան մշակույթի տանը կազմակերպվել են օրվան նվիրված մշակութային միջոցառումներ, համայնքի տարբեր բնակավայրում իրականացվում են ծառատնկման աշխատանքներ:
Օրվա միջոցառումները միավորել են կրթություն, երիտասարդություն, մշակույթ բաղադրիչները:
ՀՀ Քաղաքացու օրվա առթիվ Գավառ համայնքի Գանձակ բնակավայրում տեղի է ունեցել «Մենք ենք մեր պետությունը խորագրով» բանախոսություն, որին հաջորդել է Գանձակի երաժշտական դպրոցի և մշակույթի տան շնորհալիների մասնակցությամբ համերգային ծրագիր և ձեռքի աշխատանքների ցուցահանդես։
Վարդենիս համայնքի վարչական տարածքում՝ քաղաքում և բնակավայրերում, կազմակերպվել է ծառատունկ՝ որպես բնության պահպանության և սերունդների հանդեպ պատասխանատվության խորհրդանիշ։ Ակունքի և Վարդենիս քաղաքի Մհեր մշակույթների տներում անցկացվել են թեմատիկ բանախոսություններ՝ «Մենք ենք մեր պետությունը» խորագրով։ Վարդենիս քաղաքի Ռոմանի փողոցում տեղադրված տաղավարներում կազմակերպվել է ցուցահանդես-հյուրասիրություն։
Վարդենիսի Վիկտոր Համբարձումյանի անվան քաղաքային զբոսայգում տեղի է ունեցել տոնական համերգային ծրագիր՝ DJ KARE-ի և «By THE WAY BAND»-ի մասնակցությամբ։
Մարտունու մշակույթի կենտրոնում հրավիրված հանդիպման բանախոսն է եղել Գավառի պետական համալսարանի հումանիտար մասնագիտությունների ֆակուլտետի դեկան, բանասիրական գիտությունների թեկնածու, դոցենտ Թաթուլ Ասոյանը։ Մարտունի համայնքի Ծովասար գյուղի մշակույթի կենտրոնում ելույթ է ունեցել Մարտունու ավագ դպրոցի տնօրեն Վարդան Ավետիսյանը։
Վարդենիկի երաժշտական դպրոցում հանդիպում է կայացել Հ․Պարոնյանի անվան թատրոնի տնօրեն Լիլիթ Պետրոսյանի հետ։
Մարտունի համայնքի Վերին Գետաշեն գյուղի մշակույթի կենտրոնում հանդես է եկել Քրիստինե Արոյանը՝ «Մեր ժամանակների հերոսը-2025» մրցույթի հաղթողը։
Հանդիպումներ ու միջոցառումներ են տեղի ունեցել նաև Ճամբարակ համայնքի Ջիլ և Դպրաբակ բնակավայրերում։
Բոլոր նշված վայրերում բանախոսությունների ավարտից հետո կայացել է տոնական համերգային ծրագիր։
Միջոցառումները բաց են եղել բոլոր ցանկացողների համար։
Գեղամա աշխարհ