Գեղարքունիքի մարզի Վարդենիս համայնքում անցկացվել է «Գեղարքունյաց ձմեռ-2026» մարզամշակույթային միջոցառումը՝ «Լինենք առողջ» խորագրով։
Ինչպես տեղեկացրին Վարդենիսի համայնքապետարանի աշխատակազմից, միջոցառմանը ներկա են եղել Վարդենիս համայնքի ղեկավար Ահարոն Խաչատրյանը, համայնքապետարանի աշխատակազմի ներկայացուցիչներ, բնակավայրերի վարչական ղեկավարները և բազմաթիվ բնակիչներ, Վարդենիսի հանարակրթական դպրոցների, թիվ 1 քաղաքային մարզադպրոցի, Ռաֆիկ Եսայանի անվան մարզադպրոցի, շախմատի ակադեմիայի սաները և մարզասերները։ Մարզամշակութային օրվա մեկնարկը տրվել է Վարդենիսի շախմատի ակադեմիայում, որտեղ համայնքի ղեկավար Ահարոն Խաչատրյանը ողջունել է շախմատիստներին և կատարել առաջին խորհրդանշական քայլը։
Այնուհետ Վարդենիսի Ռաֆիկ Եսայանի անվան մարզադպրոցի մարզադաշտում բազմամարդ միջոցառումը սկսվել է Վարդենիսի թիվ 1 ՄԵԴ-ի երգչախմբի կողմից Հայաստանի Հանրապետության օրհներգի կենդանի կատարմամբ, բարձրացվել է Հայաստանի Հանրապետության պետական դրոշը։ Ողջույնի խոսքով հանդես է եկել Համայնքի ղեկավարը։ Մասնակիցներն իրենց ուժերն են չափել շախմատ, կշռաքարերի բարձրացում, պարկացատկ, պարանի ձգում, մինի ֆուտբոլ, ազգային կոխ,ձնագնդիով կամ թենիսի գնդակով հարված նշանակետին մարձախաղաձևերում։
1-ին, 2-րդ, 3-րդ տեղ գրաված մասնակիցները պարգևատրվել են Վարդենիս համայնքի ղեկավարի կողմից պատվոգրերով և գեղեցիկ հուշանվերներով, իսկ թիմային մարզախաղերում 1-ին տեղ գրաված թիմերը ստացել են գավաթներ։
Միջոցառման ավարտին մարզադպրոցների տնօրեններ Դավթյան Վարդանը և Արսեն Մաթևոսյանը համայնքի ղեկավարի կողմից պարգևատրվել են շնորհակալագրերով և հուշանվերներով։
Գեղամա աշխարհ