Գեղարքունիքի մարզի հավաքական թիմը հաղթող է ճանաչվել «ՀՀ դպրոցականների շրջանում ֆիզկուլտուրա առարկայից ստուգատես» մրցաշարում։
Գեղարքունիքի մարզպետի աշխատակազմի ԿՄՍ վարչության տեղեկացմամբ՝ «ՀՀ դպրոցականների շրջանում ֆիզկուլտուրա առարկայից ստուգատես» մարզական միջոցառմանը մասնակցում են Հայաստանի Հանրապետության հանրակրթական դպրոցների 1-6-րդ դասարանների աշակերտները:
Միջոցառումը կազմակերպում և անցկացնում է «Աշխատանքային ռեզերվներ» մարզական հասարակական կազմակերպությունը` ՀՀ ԿԳՄՍ նախարարության աջակցությամբ։ Այն անց է կացվում չորս փուլով, որոնցից 1-3 փուլերն արդեն անցկացվել էինբ 2024-2025 ուսումնական տարվա ապրիլ-մայիս ամիսներին։
Մրցումների ծրագրում ընդգրկված են՝ վազք 60 մետր` բարձր մեկնարկից, վազք՝ 500 մետր, հեռացատկ թափավազքից, ձգումներ կախ դրությունից` տղաներ, ձեռքերի ծալումներ և ուղղումներ, պառկած հենադրությունից մարզանստարանին` աղջիկներ, թենիսի գնդակի նետում թափավազքից:
Ծրագիրը կազմված է 1-3-րդ և 4-6-րդ դասարանցիների համար։
1-3-րդ դասարանցիները մասնակցում են ներդպրոցական, համայնքային և մարզային փուլերին, իսկ 4-6-րդ դասարանցիները՝ նաև եզրափակիչ փուլին։
Եզրափակիչ փուլում 4-6-րդ դասարանցիների համար անցկացվում է նաև զվարճալի վազքահերթ և փոխանցումավազք մարզական մրցումները։
Միջոցառման եզրափակիչ փուլն անցկացվել է 2025 թվականի նոյեմբերի 20-ին, որտեղ Գեղարքունիքի մարզի հավաքական թիմը ներկայացրել են մարզային փուլում հաղթող ճանաչված՝ 4-րդ դասարանցիների մրցապայքարում՝ Վերին Գետաշենի թիվ 1 միջնակարգ (ֆիզղեկ՝ Ռուբիկ Մուրադյան), 5-րդ դասարանցիների մրցապայքարում՝ Մարտունու Մ. Մելիք-Շահումյանցի անվան թիվ 1 հիմնական (ֆիզղեկ՝ Հակոբ Ջիվանյան) և 6-րդ դասարանցիների մրցապայքարում՝ Գավառի Պ. Ղանդիլյանի անվան թիվ 2 միջնակարգ (ֆիզղեկ՝ Ստյոպա Սարգսյան) դպրոցների թիմերը:
Ծավալված հետաքրքիր և անզիջում պայքարում մարզի հավաքական թիմը գրավել է առաջին տեղը՝ արժանանալով մրցաշարի հաղթողի կոչմանը։
Հավաքական թիմը պարգևատրվել է գավաթով և հավաստագրով, իսկ թիմի անդամները՝ հավաստագրերով և մեդալներով։
Գեղամա աշխարհ