Գեղարքունիքի մարզի Գավառ համայնքի Բերդկունք գյուղի մանկապարտեզի նորակառույց շենքի շինարարական աշխատանքները, որոնց մեկնարկը տրվել էր 2023 թվականի ապրիլ ամսից, ՀՀ կառավարության կողմից իրականացվող սուբվենցիոն ծրագրերի շրջանակներում, արդեն գտնվում են ավարտական փուլում։
Գավառի համայնքապետարանի աշխատակազմի տեղեկացմամբ՝ ծրագրի պայմանագրային արժեքը կազմում է 450 միլիոն դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Գավառի համայնքապետարանը։ Նորակառույց շենքը երկհարկանի է՝ նկուղային հարկով, շուրջ 1100 քմ մակերեսով։ Այն կգործի 90 սանի համար՝ 3 խմբով։
2025 թվականի նոյեմբերի 11-ի դրությամբ շինարարական աշխատանքներն այստեղ գտնվում են ավարտական փուլում։ Մանկապարտեզը թեև կառուցվել է Բերդկունք գյուղի վարչական տարածքում, սակայն այստեղ կհաճախեն նաև հարևանությամբ գտնվող Հայրավանք գյուղի նախադպրոցական տարիքի երեխաները։
Շուտով կիրականացվի գույքի ձեռքբերման գործընթացը, որից հետո, ամենայն հավանականությամբ, 2026 թվականի ընթացքում նորակառույց մանկապարտեզն իր դռները կբացի Բերդկունքի և Հայրավանքի նախադպրոցական տարիքի երեխաների առջև։
Գեղամա աշխարհ