Նոյեմբերի 11-ին Գեղարքունիքի մարզի Վարդենիս համայնքի Խաչաղբյուր գյուղում անցկացվեց «Ոսկե աշուն» խորագիրը կրող դպրոցական փառատոնը, որը կազմակերպել էր դպրոցի վարչական համակարգող Հերմինե Պետրոսյանը՝ դպրոցի տնօրեն Նաիրա Սարգսյանի, ուսուցիչների եւ աշակերտների հետ համատեղ։
Օրհնության կարգ կատարեց Հայ Առաքելական եկեղեցու Գեղարքունյաց թեմի Վարդենիսի տարածաշրջանի հոգեւոր հովիվ Տեր Հարություն քահանա Հունանյանը։
Տոնական տաղավարները լցվել էին երգով, պարով և աշնան գույներով։
Աշակերտները ներկայացան երգով, պարով, ասմունքով՝ փոխանցելով աշնան ջերմությունը փառատոնի մասնակիցներին։
Տոնն ավարտվեց ժպիտներով և լավ տրամադրությամբ՝ թողնելով գեղեցիկ հիշողություններ բոլորիս սրտերում։
Փառատոնը հյուրընկալել էր նաև Վարդենիսի համայնքապետարանի աշխատակիցներին և Փաստավավերագրական միջազգային ակադեմիայի նախագահ Սամվել Հակոբյանին։
Փառատոնի ավարտից հետո Խաչաղբյուր գյուղի Կարինե Գեւորգյանի անվան միջնակարգ դպրոցը ՓՎՄ Ակադեմիայի կողմից պարգեւատրվեց «Լավագույն Դպրոց» պատվոգրով, իսկ դպրոցի վարչական համակարգող Հերմինե Պետրոսյանը՝ ակադեմիայի «Մովսես Խորենացի» ոսկե մեդալով։ Վերջինս իր կողմից նվերներ հանձնեց փառատոնի տարբեր անվանակարգերում հաղթած դասարաններին։ Փառատոնի ակտիվ կազմակերպիչ ուսուցիչներ Աննա Պետրոսյանը և Ռուզաննա Ղազարյանը , պարուսույց Սոս Գաբոյանը եւ աշակերտ Վերջինիա Գաբոյանը պարգևատրվեցին ՓՎՄԱ պատվոգրերով։
-Փառատոնը Խաչաղբյուր գյուղի միջնակարգ դպրոցի բակ էր տեղափոխել աշնան սքանչելի գույները, առատ բերք ու բարիքը, խոհանոցի ավանդական ուտեստները, ազգագրական երգերն ու պարերը, ասմունքը, ամենապայծառ տրամադրությունները։
Այս ամենը խոսում է այն մասին, որ դպրոցում տարվել ու տարվում է կրթադաստիարակչական գովելի ու ջանադիր աշխատանք, մանկավարժական կոլեկտիվի կողմից նկատվում է սեր ու նվիրում իրենց գործի հանդեպ,-ներկայացրեց Փաստավավերագրական միջազգային ակադեմիայի նախագահ Սամվել Հակոբյանը։
«Գեղամա աշխարհ»