Ծափաթաղում հոկտեմբերի 27-ի հետկեսօրին անհետացած երեքամյա Տիգրան Օվանեսովի դին հայտնաբերվեց նոյեմբերի երկուսի ժամը 15-ի սահմաններում, Ծափաթաղ եւ Ջիլ գյուղերի դաշտամիջյան հատվածում։
Արդեն իսկ հրապարակված ու հաստատված պաշտոնական տվյալներով՝ ընդամենը երեք տարեկան երեխայի հետ կատարվել է հրեշավոր եղեռնագործություն, որի հեղինակը, ոչ ավել, ոչ պակաս, հենց Տիգրանի հայրն է, Արմեն Օվանեսով կոչեցյալ ոճրագործը։ 
Նա իր ձեռքերով խեղդամահ է արել բոլորովին անմեղ ու անպաշտպան երեխային՝ ելնելով իր երեւակայական վրեժխնդրության կարիքից։
Դեռ նախաքննությունը շատ բաներ ունի անելու՝ այս քստմնելի պատմության ողջ մանրամասները բացահայտելու համար, ուստի առայժմ զերծ ենք մնալու այլ փաստեր հրապարակելուց, այլ գնահատականներ հնչեցնելուց, մինչեւ որ մեղսագործը դատարանի կողմից չստանա իր արժանի պատիժը։
Այո, մենք բախվել ենք մի այնպիսի դաժան իրականության, որտեղ գործել է բիրտ ու անասնական ուժը, որտեղ ջնջվել են ընտանեկան ավանդներն ու բարոյական բոլոր արժեքները, որտեղ գործել է անսանձ բռնությունն ու վրեժի, չարամիտ հաշվեհարդարի օրենքը։
Մենք պետք է ավելի լարենք մեր ուժերը՝ նման չարիքների դեմ անհաշտ պայքար մղելու, նրանց իսպառ ու մեկընդմիշտ չեզոքացնելու համար։
Խունկ ու աղոթք անմեղ ու հրեշտակային Տիգրանի հիշատակին։
Գեղամա աշխարհ