Գեղարքունիքի մարզի Վարդենիս քաղաքի բազմաբնակարան թվով 10 շենքերի բակային տարածքները հիմնանորոգվում են ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում։
Վարդենիսի համայնքապետարանի աշխատակազմի տեղեկացմամբ՝ Վարդենիսի բազմաբնակարան 10 շենքերի բակային տարածքների հիմնանորոգման ծրագրի պայմանագրային արժեքը կազմում է 163 միլիոն 872 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Վարդենիսի համայնքապետարանը։
Ծրագրով նախատեսված է Վարդենիս քաղաքի Երիտասարդության 2, 3, 6, 11, 12, Արզոյան 2, Վ․Համբարձումյան 17 և 19, Լեռնագործնեի 1/1 և ½ հասցեներում գտնվող բազմաբնակարան շենքերի բակային տարածքների հիմնանորոգում՝ ասֆալտապատմամբ, եզրաքարերի տեղադրմամբ, ջրահեռացման համակարգերի նորոգմամբ, այլ կարգի աշխատանքներով։ Հիմնանորոգվող բակային տարածքներն ընդգրկում են 14 հազար 341 քառակուսի մետր մակերես։
Շինարարական աշխատանքների մեկնարկը տրվել է 2025 թվականի օգոստոս ամսից։ 2025 թվականի հոկտեմբերի 28-ի դրությամբ շինարարական աշխատաքններն ավարտված են շուրջ 70 տոկոսով։
Բակերի բարեկարգման աշխատանքները սկսել են կոյագծերի փոխարինման և թարմացման աշխատանքներով՝ հետագայում ասֆալտի շերտը քանդելուց զերծ պահելու համար: Շինաշխատանքների ընթացքում ապամոնտաժվում են նաև ապօրինի ավտոտնակներն ու օժանդակ կառույցները, որոնց հաշվին էլ ընդարձակվում են բակային տարածքները: Վարդենիս համայնքի ղեկավարի առաջին տեղակալ Կարեն Մկրտչյանի ներկայացմամբ՝ Ազգալդյան փողոցի բազմաբնակարան շենքի բակում, թվով 7-8 ապօրինի ավտոտնակներ են ապամոնտաժվել: Տարածքը ազատվել է, կառուցվում է նաև խաղահրապարակ:
Ծրագրի իրականացման արդյունքում ոչ միայն հիմնանորոգվում ու բարեկարգվում են բազմաբնակարան շենքերի բակային տարածքները, այլ նաև երեխաներն ունենալու են զբոսանքի ու խաղերի համար ընդարձակ տարածք:
Շինարարական աշխատանքները նախատեսված է ավարտի հասցնել 2025 թվականի ընթացքում։
Գեղամա աշխարհ