Գեղարքունիքի մարզի Մարտունի համայնքի Լեռնակերտ-Մադինա միջհամայնքային նշանակության ավտոճանապարհի հիմնանորոգման աշխատանքներն արեն գտնվում են ավարտական փուլում, որոնք կատարվել են ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում։
Մարտունու համայնքապետարանի աշխատակազմի տեղեկացմամբ՝ Լեռնակերտ-Մադինա ավտոճանապարհի հիմնանորոգման ծրագրի պայմանագրային արժեքը կազմում է 97 միլիոն 327 հազար 565 դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Մարտունու համայնքապետարանը։
Ծրագրով նախատեսված է Լեռնակերտ-Մադինա ավտոճանապարհի հիմնանորոգում՝ 1100 գծամետր երկարությամբ և 5500 քմ մակերեսով։ Կառուցվում է նաև ջրահեռացման համակարգ։
Շինարարական աշխատանքները սկսվել են 2025 թվականի օգոստոսից և 2025 թվականի հոկտեմբերի 28-ի դրությամբ գտնվում են ավարտական փուլում։
Ճանապարհի հիմնանորոգվող հատվածը Լեռնակերտի նոր կառուցվող դպրոցն արդեն կապում է Մադինայի Սուրբ Ամենափրկիչ նորակառույց եկեղեցու և Ներսես Կարապետյանի տուն-թանգարան տանող գլխավոր ճանապարհի հետ։ Ծրագրի շրջանակներում վերանորոգվել է նաև Մադինա և Լեռնակերտ բնակավայրերն իրար կապող կամուրջը, որի շրջակայքում Արգիճի գետի հիասքանչ կիրճն է ու Արմաղան լեռը՝ նույնքան սքանչելի բնապատկերներով։
Ծրագիրն ունի ոչ միայն տնտեսական, այլ նաև՝ զբոսաշրջային կարևոր նշանակություն։ «Լեռնակերտ-Մադինա և Մադինայի 10-րդ փողոցի հիմանորոգմամբ ակնկալում ենք բազմաթիվ զբոսաշրջիկների հոսք դեպի Արգիճի գետ ու սարահարթ, Արմաղան լեռ ու Ներսես կարապետյանի տուն-թանգարան»,-ներկայացրին Մարտունու համայնքապետարանի աշխատակազմից։
Գեղամա աշխարհ