ՀՀ ՆԳՆ Փրկարար ծառայության նախաձեռնությամբ Գեղարքունիքի մարզպետի աշխատակազմի դահլիճում կազմակերպվեց հրդեհների կանխարգելմանն ու կամավորական շարժման զարգացմանն ուղղված ուսուցողական ծրագրի դասընթաց։
Դասընթացի կազմակերպիչների տեղեկացմամբ՝ միջոցառման հիմնական նպատակն էր՝ հրդեհների կանխարգելումը, ռիսկերի գնահատումը, արագ արձագանքման կարողությունների բարձրացումը, ինչպես նաև կամավորական շարժման զարգացումը՝ ի նպաստ համայնքային դիմակայունության և բնապահպանական անվտանգության ամրապնդման։
Դասընթացին մասնակցեցին ՀՀ Գեղարքունիքի մարզպետի աշխատակազմի աշխատակիցներ և բնակավայրերի վարչական ղեկավարներ, ինչպես նաև՝ ներկայացուցիչներ ՀՀ շրջակա միջավայրի նախարարության էկոպարեկային ծառայությունից, «Հայանտառ» ՊՈԱԿ-ից, ՀՀ բնապահպանության և ընդերքի տեսչական մարմնից։
Շեշտադրվեց համայնքների ներգրավվածության կենսական նշանակությունը հրդեհների դեմ պայքարում։ Հատկապես կարևորվեց կամավորականների պատրաստվածության մակարդակի բարձրացումը, որպեսզի արտակարգ իրավիճակների դեպքում նրանք կարողանան արձագանքել օպերատիվ և համակարգված՝ մինչ մասնագիտացված փրկարարական ստորաբաժանումների ժամանումը։
«Նմանօրինակ քայլերը ոչ միայն կանխարգելում են հրդեհների տարածումը, այլև ամրապնդում են համայնքային դիմակայունությունը։
ՀՀ ՆԳՆ փրկարար ծառայությունը շարունակելու է ընդլայնել դասընթացների աշխարհագրությունը, բարձրացնել մասնագիտական պատրաստվածությունը և խթանել համայնքային ներգրավվածությունը՝ որպես կամավորական շարժման զարգացման և հրդեհների կանխարգելման կարևոր բաղադրիչ»,-նշեցին դասընթացի կազմակերպիչները։
Գեղամա աշխարհ