Գեղամա լեռնավահանի հարավային թեւում, ծովի մակերեւույթից մոտ 3100 մետր բարձրության վրա, Գեղարքունիքի մարզի Սարուխան գյուղից շուրջ 20 կիլոմետր հեռավորության վրա ծփում է Նազենի անունը կրող լիճը։
Բարձրաբերձ լեռների գոգավորության մեջ սքանչելի պատկեր է սփռում այս լիճը շրջապատով մեկ։
Նրանից երկու տեղով սկիզբ են առնում երկու գետակներ, որոնք ձեւավորում են Գավառագետը վերին հոսանքներում։
Մեր այցելության պահին թեեւ հուլիս ամիսը կիսվել էր, սակայն Նազենի լիճը շարունակում էր սնվել իր շրջակա բարձունքների ձնհալի ջրերից։ Ավելին, նրա հատակից բխում ու ցայտում էին աղբյուրները։ Նազենին զուլալ է ու սառնորակ, արեւի ցոլքերի տակ բազմագույն տեսք առած։
Ափից տաս-քսան մետր հեռավորությամբ արդեն այն խորանում է մի քանի մետրով, իսկ, ըստ կատարված ուսումնասիրությունների, կենտրոնական հատվածներում այն ունի մինչեւ երեսուն մետր խորություն։
Լիճը զբաղեցնում է ավելի քան հինգ հեկտար տարածք։
Այն գտնվում է Սպիտակասար լեռան արեւմտյան կողմում։
Նազենիի հյուսիսային կողմում կան հինգ փոքր լճակներ, որոնք դեռ ցամաքած չէին ամռան կեսին ու իրենց հերթին առանձնակի շուք էին հաղորդում լեռների ու լճի համայնապատկերին։
Եվ այդ զուլալ, սառնորակ ու անապական ջրին հաղորդվելու երջանիկ բախտն ունեցա, մի կարճ ժամանակ լող տալով Նազենիի սրտի ու հոգու դիցական տիրույթներում։ 
Նազելի լեռնագագաթը գտնվում է Գեղամա Լեռնավանում, Սպիտակասարից արեւմուտք։
Նրա հայացքի ներքո էլ ծփում է Նազենի անունը կրող լեռնային լիճը։
Իսկ այս տարվա հոկտեմբերին ինձ բախտ վիճակվեց` գտնվել Նազենի լճի դիմաց, դիտել այնքան պարզ երեւացող մեր հրաշք լեռնաշխարհը, զույգ Մասիսները, դրա հետ մեկտեղ` Նազենի լեռն իր ողջ հմայքով , ճիշտ այն պահին, երբ Արեւն իր հրաշափայլ շողքերով թագ էր կապել Նազենիի գագաթին։
Մայրամուտի գույներն այնքան մոտիկ էին, այնքան սրտառուչ, այնքան սիրելի։
Կյանքն այդ պահին մի ուրիշ ժպիտ ուներ, մի ուրիշ հեքիաթային իրականություն։
Եվ այդ ակնթարթը հավերժացրի այսպես, հնասեր Թաթուլ Տոնոյանի շնորհիվ, հնագետ Լեւոն Մկրտչյանի, հայրենի պատմության արժեքներն ուսումնասիրող ու գաղտնիքները բացահայտող Աննա Մարտիկյանի ուղեկցությամբ։
Իրոք, աննման է մեր չքնաղ հայրենիքը, որի շունչն ու ոգին պետք է զգալ՝ միշտ նրան փարվելով։
Խոսրով Խլղաթյան