Գեղարքունիքի մարզի Սևան համայնքում բացվել է «Երազանք» անունը կրող հեծանվային արահետ։
Ինչպես տեղեկացրին Սևանի համայնքապետարանի աշխատակազմից, բացման արարողությանը մաասնակցել են Գեղարքունիքի մարզպետ Կարեն Սարգսյանը, Սևանի համայնքապետարանի աշխատակազմի ղեկավար Արմենուհի Ղուկասյանը, համայնքապետարանի աշխատակիցներ, հեծանվասեր պատանիներ, դպրոցականներ և մեծահասակներ։ Արահետը ձգվում է 6 կիլոմետր երկարությամբ՝ լի արկածներով, գեղեցիկ տեսարաններով ու դրական էներգիայով։
Օրվա ամենասպասված իրադարձություններից է եղել հեծանվարշավը, որը մեկնարկել է «Երազանքի այգուց» և պարեկների ուղեկցությամբ հասել մինչև «Երազանքի արահետ»։ Մասնակիցները հաղթահարել են վերելքները, վայելել Սևանի հիասքանչ բնապատկերները։
Արահետը կահավորված է ուղղորդող ցուցանակներով, որոնք օգնում են հեծանվորդներին՝ հեշտությամբ կողմնորոշվել, ինչպես նաև ներկայացնում են հետաքրքիր տեղեկություններ Սևանի մասին՝ դառնալով յուրօրինակ ուղեցույց քաղաքի հյուրերի և զբոսաշրջիկների համար։ Տեղադրվել են նաև հեծանվային հատուկ կանգառներ։
Հեծանվային մշակույթի ձևավորման և համայնքում նախաձեռնության իրականացման գործում ներդրում ունենալու համար «Սևան երիտասարդական ակումբ» ՀԿ նախագահ Գոհար Մնացականյանը հուշանվերներ է հանձնել Գեղարքունիքի մարզպետ Կարեն Սարգսյանին, Սևանի համայնքապետարանի աշխատակազմի ղեկավար Արմենուհի Ղուկասյանին, աշխատակազմի ԿՄՍԵ հարցերի բաժնի պետ Նարինե Հարությունյանին, հեծանվային սպորտի մարզիչ Արմեն Երիցյանին և «SevanVELOtime» նախաձեռնության հեղինակ Հերմինե Անդրիկյանին։
Ծրագիրն իրականացվել է «Սևան երիտասարդական ակումբ» ՀԿ-ի կողմից՝ «The Stirling Foundation»-ի աջակցությամբ։ Ծրագրում իր ներդրումն է ունեցել նաև Սևան համայնքը։
Գեղամա աշխարհ