Գեղարքունիքի մարզում 2025 թվականի վերջին օրվա դրությամբ ամբողջությամբ ավարտվել է սուբվենցիոն 156 ենթածրագիր։
Գեղարքունիքի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչությունից ստացված տեղեկատվության համաձայն՝ 2025 թվականին Գեղարքունիքի մարզի համայնքների կողմից ներկայացվել է 31 ծրագիր՝ 136 ենթածրագրով, որից Միջգերատեսչական հանձնաժողովի կողմից հաստատվել է 28 ծրագիր՝ 128 ենթածրագրով, և 2025 թվական է տեղափոխվել 2023-2024 թվականներից 94 ենթածրագիր։ Այսպիսով, 222 ենթածրագրերի ընդհանուր արժեքը կազմել է 18,3 միլիարդ ՀՀ դրամ, որից ՀՀ կառավարության մասնաբաժինը 11,4 միլիարդ դրամ է, կամ ընդհանուր արժեքի 62,3 տոկոսը, համայնքային մասնաբաժինը՝ 6,9 միլիարդ դրամ, կամ 37,7 տոկոս։
2025 թվականի դեկտեմբերի 30-ի դրությամբ ամբողջությամբ ավարտվել են 156 ենթածրագրեր: 66 ենթածրագրերից 60—ի ավարտման ժամկետը պայմանագրով նախատեսված է 2026 թվականին, իսկ 6 ենթածրագրեր տարբեր պատճառներով են տեղափոխվել այս տարի:
156 ավարտված ենթածրագրերի արդյունքում ծախսվել է շուրջ 11 միլիարդ 989 միլիոն դրամ, որից ՀՀ կառավարության մասնաբաժինը 7 միլիարդ 222 միլիոն դրամ է, համայնքային մասնաբաժինը՝ 4 միլիարդ 766 միլիոն դրամ։
Ընդհանուր առմամբ, մարզում սուբվենցիոն ծրագրերի շրջանակներում 2025 թվականի ընթացքում կառուցվել է 84 կիլոմետր 69 մետր խմելու ջրագիծ, 50 կիլոմետր 25 մետր ոռոգման ցանց, 50 կիլոմետր 768 մետր լուսավորության ցանց և 4 կիլոմետր 954 մետր գազատար։ Ասֆալտապատվել և սալիկապատվել է 65 կիլոմետր 200 մետր համայնքային նշանակության փողոցներ ու մայթեր, 9079 քառակուսի մետր մակերես զբաղեցնող բազմաբնակարան շենքերի բակեր, սալարկվել է 6958 քառակուսի մետր համայնքային նշանակության փողոցներ և մայթեր։ Հիմնանորոգվել են 8 բազմաբնակարան բնակելի շենքերի տանիքներ՝ 5581 առակուսի մետր ընդհանուր մակերեսով, կառուցվել է մեկ մանկապարտեզ՝ 90 սան հզորությամբ, Գավառ քաղաքում շահագործվել է շատրվանային համակարգ, ինչպես նաև Ծակքար բնակավայրում կառուցվել է հանդիսության սրահը, վերանորոգվել է մշակութային կենտրոնը և Ճամբարակի համայնքապետարանի վարչական շենքը։
2025 թվականի ընթացքում մշակութային կենտրոնների, համայնքային նշանակության շենքերի և մանկապարտեզների համար ձեռք է բերվել անհրաժեշտ գույք։
ՀՀ Գեղարքունիքի մարզպետի հանձնարարությամբ շուրջ 450 մշտադիտարման այցեր են իրականացվել մարզում այլ գերատեսչությունների և սուբվենցիոն ծրագրերի շրջանակներում իրականացվող շինարարական օբյեկտներում: Ուումնասիրությունների արդյունքում 39 օբյեկտում արձանագրվել են թերություններ, որոնց գերակշիռ մասը կապալառու կազմակերպությունների կողմից շտկվել է, իսկ մնացածը գտնվում է շտկման փուլում:
Գեղամա աշխարհ