Գեղարքունիքի մարզի սահմանամերձ բնակավայրերում Կարմիր խաչի միջազգային կոմիտեի ծրագրերը կշարունակվեն նաև 2026 թվականի ընթացքում։
Ինչպես տեղեկացրին Գեղարքունիքի մարզպետի աշխատակազմից, դեկտեմբերի 12-ին Գեղարքունիքի մարզպետ Կարեն Սարգսյանն ընդունել է Հայաստանում Կարմիր խաչի միջազգային կոմիտեի քաղաքական և գործառնական խորհրդական Ավետիք Փաշայանին։
Հանդիպման ընթացքում Ավետիք Փաշայանը ներկայացրել է Գեղարքունիքում ԿԽՄԿ կողմից 2025 թվականին իրականացված առողջապահական և միկրոտնտեսական աջակցությունների ուղղվածության ծրագրերի ընթացքն ու արդյունքները, ինչպես նաև 2026 թվականին սահմանամերձ ու թիրախային համայնքներում նախատեսվող աշխատանքները։
Ավետիք Փաշայանի հավաստմամբ՝ 2025 թվականի հիմնական ծրագրերը հաջողությամբ ավարտվել են, իսկ 2026-ին դրանք շարունակվելու և ընդլայնվելու են։
Քննարկվել են նաև առաջիկա տարվա ծրագրերի ուղղությունները, համագործակցության հնարավորությունները և մի շարք այլ հարցեր։
Մարզպետ Կարեն Սարգսյանը շնորհակալություն է հայտնել ԿԽՄԿ իրականացրած աշխատանքների համար և վստահեցրել , որ Գեղարքունիքի մարզպետի աշխատակազմը 2026 թվականին ևս պատրաստ է աջակցել ծրագրերի արդյունավետ իրականացմանը։
Գեղամա աշխարհ