Գեղարքունիքի մարզի Մարտունի համայնքի Վարդաձոր գյուղում ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում հիմնանորոգվել է 3 փողոց և 1 փողոցի փակուղի։
Ինչպես տեղեկացրին Մարտունու համայնքապետարանի աշխատակազմից, Վարդաձորի փողոցների հիմնանորոգման ծրագրի պայմանագրային արժեքը կազմում է 77 միլիոն 222 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Մարտունու համայնքապետարանը։
Ծրագրով նախատեսված է Վարդաձոր գյուղի 3-րդ, 19-րդ 28-րդ փողոցների և Ալաշկերտ փողոցի 6-րդ փակուղու ասֆալտապատում՝ 1280 գծամետր ընդհանուր երկարությամբ և 6400 քառակուսի մետր մակերեսով։
Շինարարական աշխատանքները մեկնարկել են 2025 թվականի հոկտեմբերի վերջից և նոյեմբերի 28-ի դրությամբ գտնվում են ավարտական փուլում։
Աշխատանքներն իրականացրել է «ՎՄՎ ՔԱՄՓՆԻ» ՍՊԸ-ն։
Վարդաձորի վերոնշյալ փողոցներն իրենց պատմության մեջ ասֆալտապատվում են առաջին անգամ։
Գեղամա աշխարհ