Կայացել է Սևան համայնքի ավագանու 10-րդ նստաշրջանի 2-րդ նիստը, որը վարել է Սևան համայնքի ղեկավարի առաջին տեղակալ Արթուր Մարգարյանը:
Ինչպես տեղեկացրին Սևանի համայնքապետարանի աշխատակազմից, օրակարգային հարցերի հաստատումից հետո Սևանի համայնքապետարանի աշխատակազմի պատասխանատուները ներկայացրել են քննարկման ներկայացրած որոշումների նախագծերը:
Սևան համայնքի 2026 թվականի բյուջեի երրորդ եռամսյակի կատարողականը ներկայացրել է համայնքապետարանի աշխատակազմի ֆինանսատնտեսագիտական, եկամուտների հաշվառման և հավաքագրման բաժնի պետի ժ/պ Մարիանա Ռաֆայելյանը, նշելով, Սևան համայնքի 2026 թվականի բյուջեի երրորդ եռամսյակի եկամուտների հավաքագրման պլանը կատարվել է 94.5 տոկոսով։
Հաշվի առնելով 2026 թվականին համայնքում իրականացված մասնակցային բյուջետավորման գործընթացը և դրա արդյունքները՝ ավագանին համապատասխան որոշմամբ սահմանել է Սևան համայնքում 2027 թվականի մասնակցային բյուջետավորման գործընթացի մեկնարկը:
Համայնքի ավագանու մեկ այլ որոշմամբ Սևան համայնքի 2026 թվականի բյուջեից, որպես դրամաշնորհ՝ «Կոտայքի և Գեղարքունիքի մարզի կոշտ կենցաղային թափոնների կառավարում» ՍՊԸ-ին հատկացվել է 2026 թվականի 4-րդ եռամսյակի համար պայմանագրով նախատեսված գումարը՝ 31 միլիոն 72 հազար դրամի չափով։
Սևան համայնքի ավագանին հաստատել է նաև Սևան համայնքի 2027 թվականի բյուջեի նախագիծը:
Ավագանու մեկ այլ որոշմամբ Սևան համայնքի Լճաշեն բնակավայրի «Մանչուկ» մանկապարտեզում բացվել է նոր խումբ։
Օրակարգային հարցերի սպառումից հետո ներկայացվել են համայնքի ավագանուն ֆիզիկական և իրավաբանական անձանց կողմից հասցեագրված դիմումները, վարչական ղեկավարների կողմից ներկայացված զեկուցագրերը, որոնց զգալի մասը ստացել են սպառիչ պատասխան:
Համայնքի ավագանու նիստն ամփոփվել է «Հայաստանում թափոնների կառավարման քաղաքականություն» ծրագրի ղեկավար, շրջանաձև տնտեսության փորձագետ Հարություն Ալպետյանի և ծրագրի համակարգող Վարդուհի Եսայանի մասնակցությամբ, որոնք ներկայացրել են Սևան համայնքում 2025 թվականի հուլիսի 26-ից ներդրված տեսակավորման թափոնների կառավարման համակարգը, մանրամասներ հաղորդել ծրագրի իրականացման, Սևան համայնքում ընթացիկ իրավիճակի, ինչպես նաև նոր ծրագրի մեկնարկի վերաբերյալ, որը նախատեսում է նաև Սևան ներդնել օրգանական թափոնների տեսակավորման համակարգ:
Գեղամա աշխարհ