Գեղարքունիքի մարզի Մարտունի համայնքի Ծակքար գյուղում կառուցված հանդիսությունների սրահը մինչ տարեվերջ արդեն պատրաստ կլինի շահագործման։
Ինչպես տեղեկացրին Մարտունու համայնքապետարանի աշխատակազմից, Ծակքարի հանդիսությունների սրահը կառուցվել է ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում։ Ծրագրի պայմանագրային արժեքը կազմում է 145 միլիոն 900 հազար դրամ, որի 50 տոկոսը հատկացրել է ՀՀ կառավարությունը, 50 տոկոսը՝ Մարտունու համայնքապետարանը։ Ծրագրով նախատեսվել է հանդիսությունների միհարկանի սրահի կառուցում՝ 540 քառակուսի մետր մակերեսով, որը պետք է ծառայի բնակիչներին՝ հոգեհանգստի, ծիսական արարողությունների և համայնքային այլ միջոցառումների կազմակերպման համար։
Շուրջ 3000 քմ հատկացված տարածքում կառուցված սրահն ապահովված է բոլոր անհրաժեշտ պայմաններով ու գույքով։
«Փաստաթղթավորման գործընթացն ավարտվելուց հետո շենքը կմիանա խմելու ջրի, էլեկտրականության և կենցաղային գազի կոմունիկացիոն ցանցերին, ապա՝ պաշտոնապես կհանձնվի շահագործման։
Մարտունի համայնքի ղեկավար Հովհաննես Հովեյանն օրերս այցելել է Ծակքար բնակավայրի նորակառույց հանդիսությունների սրահի տարածք՝ տեղում դիտարկելու կատարված աշխատանքները»,-ներկայացրին Մարտունու համայնքապետարանի աշխատակազմից։
Գեղամա աշխարհ