Գեղարքունիքի մարզի Մարտունի համայնքի Զոլաքար գյուղն օրերս հյուրընկալել է արտասահմանյան 11 երկրներ ներկայացնող զբոսաշրջիկների, ովքեր բավականին հագեցած օր են անցկացրել Զոլաքարի պատմամշակութային հուշարձանների տարածքներում, կրթամշակութային օջախներում, ինչպես նաեւ՝ «Իրիցու տուն» հացատուն-թանգարանում։
Ինչպես տեղեկացրին Մարտունու համայնքապետարանի աշխատակազմից, զբոսաշրջիկների այցի նպատակն էր՝ ծանոթանալ Մարտունի համայնքի ազգային մշակույթին։
Նրանց առավել տպավորել է «Իրիցու տուն» հացատուն-թանգարանը, որտեղ պահվում են մի քանի դարի վաղեմության գյուղատնտեսական գործիքներ ու կենցաղային իրեր, հազարաշեն տուն, թոնիր, ձիթահանի քար, մշակութային այլ արժեքներ, որոնք հյուրերին ներկայացրել է հացատուն-թանգարանի տնօրեն, պարուսույց, Զոլաքարի մշակույթի կենտրոնի աշխատակից Մխիթար Հարությունյանը։
Այնուհետ Զոլաքարի մշակույթի կենտրոնում Մխիթար Հարությունյանի կողմից անցկացվել է վարպետաց դաս՝ հայ ազգային պարերի ցուցադրմամբ։
«Զբոսաշրջիկները, ոգևորված բնակիչների ջերմ ընդունելությունից ու պարախմբերի, դհոլահարների ելույթներից, սովորել են պարել զոլաքարցիներին հարազատ «Ալաշկերտի Քոչարին»։ Նրանք հետևում էին պարուսույցի հրահանգներին և փորձում յուրացնել հայկական պարի ռիթմերն ու շարժումները»,-ներկայացրին Մարտունու համայնքապետարանի աշխատակազմից։
Գեղամա աշխարհ