Գավառի պետական համալսարանի ուսանողական գիտական ընկերության նախաձեռնությամբ հումանիտար մասնագիտությունների ֆակուլտետում տեղի է ունեցել ուսանողական գիտաժողով՝ նվիրված հայ մեծանուն գրող-արձակագիր Հրանտ Մաթևոսյանի ծննդյան 90-րդ տարեդարձին։
Ինչպես տեղեկացրին Գավառի պետական համալսարանի լրատվության և արտաքին կապերի բաժնից, բացման խոսքով հանդես է եկել ԳՊՀ հումանիտար մասնագիտությունների ֆակուլտետի ուսանողական գիտական ընկերության նախագահ Քրիստինե Բատիկյանը։ Ողջունելով ներկաներին՝ բանասիրական գիտությունների դոկտոր, պրոֆեսոր, ԳՊՀ հայոց լեզվի և գրականության ամբիոնի վարիչ, մաթևոսյանագետ Վաչագան Գրիգորյանը շնորհակալություն է հայտնել գիտաժողովի մասնակից ուսանողներին՝ Հրանտ Մաթևոսյանի ստեղծագործական ժառանգությունը բազմակողմանիորեն ուսումնասիրելու համար։
Գիտաժողովին մասնակցել և Հրանտ Մաթևոսյանի խորն ու բազմաշերտ ասելիքի, ստեղծած գեղարվեստական աշխարհի առանձնահատկությունների և կերտած կերպարների մասին խոսել են ԳՊՀ ռեկտոր Ռուզաննա Հակոբյանը, Հումանիտար մասնագիտությունների ֆակուլտետի դեկան Թաթուլ Ասոյանը, Հասարակական գիտությունների ամբիոնի վարիչ Համլետ Ղաջոյանը, Օտար լեզվի և գրականության ամբիոնի վարիչ Գայանե Միրիբյանը, Հայոց լեզվի և գրականության ամբիոնի դասախոս Սիրանուշ Խանդանյանը։
Գիտաժողովին ուսանողները հանդես են եկան զեկուցումներով։
«Անգլերեն լեզու և գրականություն» բաժնի բակալավրիատի 2-րդ կուրսի ուսանողուհի Սոֆի Մինասյանը ներկայացրել է «Հայը Հրանտ Մաթևոսյանի «Մեծամոր» էսսեում»թեման, «Անգլերեն լեզու և գրականություն» բաժնի բակալավրիատի 2-րդ կուրսի ուսանողուհի Սոնա Հովեյանը՝ «Դեռահասի հոգեբանությունը Հրանտ Մաթևոսյանի «Վազքը» պատմվածքում» թեման, «Պատմություն» բաժնի մագիստրատուրայի 2-րդ կուրսի ուսանողուհի Նարինե Ժամհարանը՝ «Քրիստոնեական արժեհամակարգը որպես հայրենասիրության և բարոյականության դաստիարակման միջոց» թեման։ Եղել են նաև այլ թեմաներով զեկուցումներ՝ նվիրված Արցախյան ավանդազրույցների առանձնահատկություններին, ուսուցման ժամանակակից մեթոդներին։
Զեկուցումներն ուղեկցվել են հետաքրքիր և ուսուցողական քննարկումներով։
Գիտաժողովի ավարտին մասնակիցները ստացել են հավաստագրեր:
Գեղամա աշխարհ