Գեղարքունիքի մարզի Վարդենիս համայնքի Լուսակունք գյուղում EU4Sevan+ ծրագրի շրջանակներում նախատեսվում է կառուցել բնահեն լուծումների կիրառմամբ կեղտաջրերի մաքրման կայան։
Ինչպես տեղեկացրին Վարդենիսի համայնքապետարանի աշխատակազմից, Վարդենիս համայնքի ղեկավար Ահարոն Խաչատրյանն ընդունել է Եվրոպական Միության պատվիրակության ներկայացուցիչներին՝ Համագործակցության բաժնի ղեկավար Ֆրենկ Հեսսին, EU4Sevan+ ծրագրի ղեկավար Նիլս Թևսին, խորհրդատուներ Մարտին Յեգերին, Կարապետ Օհանյանին և Վարազդատ Սարգսյանին։
Այցի նպատակն էր՝ ներկայացնել և քննարկել Վարդենիս համայնքում բնահեն լուծումների կիրառմամբ կեղտաջրերի ապակենտրոնացված մաքրման համար ընտրված տարածքները, ինչպես նաև՝ շահառու կողմերի հետ համակարգել ծրագրի իրականացման հաջորդ քայլերը։
Վարդենիս համայնքի ղեկավար Ահարոն Խաչատրյանը ողջունել է պատվիրակության անդամներին, շնորհակալություն հայտնել այցելության և արդյունավետ համագործակցության համար՝ ընդգծելով, որ նման նախաձեռնությունները կարևոր նշանակություն ունեն համայնքի կայուն զարգացման, շրջակա միջավայրի պահպանության և Սևանա լճի էկոհամակարգի պահպանման գործում։ Հանդիպումն անցել է գործընկերային և կառուցողական մթնոլորտում։
Գեղամա աշխարհ