Գեղարքունիքի մարզի Սևան համայնքում անցկացվել է «Գեղարքունյաց ձմեռ» մարզամշակութային միջոցառումը՝ «Լինենք առողջ» խորագրով:
Ինչպես տեղեկացրին Սևանի համայնքապետարանի աշխատակազմից, Միջոցառումը կազմակերպել են Սևանի համայնքապետարանը, Ն. Դագարյանի անվան մանկապատանեկան մարզադպրոցը և համայնքային մշակութային կենտրոնը։
Միջոցառմանը մասնակցել են Սևան համայնքի հանրակրթական դպրոցների, Ն. Դագարյանի անվան մանկապատանեկան մարզադպրոցի աշակերտներն ու սաները, մարզասերներ, բնակիչներ:
Տոնակատարության սկիզբն ազդարարվել է Սևանի բազմագործառութային քոլեջի հարակից բազմաֆունկցիոնալ մարզահրապարակից, որտեղ էլ կայացել է նախատեսված մարզաձևերի և խաղերի զգալի մասը՝ 8-16 կգ կշռաքարի բարձրացում, ազգային կոխ ըմբշամարտի անցկացում, նետում նշանակետին, ձնեմարդի պատրաստում:
Սևանի ՈՄԱ մարզասրահում անցկացվել են հրաձգության մրցումներ, որտեղ իրենց կարողությունները չափել են Սևանի և բնակավայրերի հանրակրթական դպրոցների բարձր դասարանների աշակերտները:
Ն. Դագարյանի անվան մանկապատանեկան մարզադպրոցում անցկացվել են շախմատի և մինի ֆուտբոլի մրցաշարեր:
Նախատեսված էր նաև բարձունքի գրավում, որն անցկացվել է Մեծեփ սարի վրա:
Մրցավարական կազմը գնահատել է արդյունքները:
Սևան համայնքի ղեկավարի պատվոգրով, շնորհակալագրով և հավաստագրերով պարգևատրվել են լավագույն մասնակիցներն ու հաստատությունները, որոնք արժանացել են նաև հուշանվերների ու գավաթների:
Գեղամա աշխարհ